محمد الشريف يكتب : يوميات من حياتى العسكرية(الجزء الثانى)

انتهيت من اعداد ما اوصانى به قدامى من خدموا بالقوات المسلحة وذهبت لمنطقه التجنيد واصطحبنا مندوب القوات البحرية الى الاسكندرية
بعد اتمام اجراءات استلامنا وبعد مواصله طويله استمرت لما يقرب من خمس ساعات وتحملنا تكلفتها كامله وصلنا الى الاسكندرية.
وذهبنا اولا الى قيادة القوات البحرية لتسليم اوراقنا ومنها الى مركز التدريب البحرى بالمعموره وهو مكان عسكري كبير يضم العديد من المنشأت التعليمية كالكلية البحرية التى كان يفصلنا عنها سور
فقط ومدارس تعليم وتدريب الجنود والصف وهى مرحلة سانتقل اليها لاحقا وبعد مسافه كبيره بين بوابة المجمع وبوابة مركز التدريب.
اخذناها سيرا على الاقدام وصلنا الى المركز فى تمام العاشره والنصف مساءاً واستقبلنا عناصر الامن البحري وفتشونا تفتيش صعب جدا
يعنى اى حد معاه تليفون او شريحة او علاج او اى متعلقات يتم تسليمها اليهم يعنى تدخل المركز بطولك بس
وطبعا لقينا شده وحده فى التعامل وبعدها لقيناهم موزعينا على السرايا يعنى المركز ده فيه 5 سرايا كل اربعه اشخاص يروحوا سرية واصطحبونا الى السرية واول مادخلنا السرية
استقبلنا رجل يظهر عليه الشده غير العادية وظهر ذلك فى التعامل مع الجنود الموجودين فى السرية قبلنا ولم يلتفت الينا الا بعد مايقرب من ربع ساعه
واحنا طبعا واقفين زى الالف ولا بنتحرك المهم قالنا انت يابنى انت وهو هدى لكل واحد رقم ينسى اسمه الا بره ويفتكر الرقم ده وفعلا هذا الرقم كان كود التعامل فى المركز
طوال الفتره التى قضيناها فيه يعنى مكناش نعرف بعض الا بالارقام يعنى انا كان رقم 185 ولو عايز انده على واحد صاحبى اقوله يا عسكرى 140 او ياعسكرى 190 كده يعنى
دا طبعا لتسهيل امور الحضور والانصراف والتجمع والتأخير وطبعا مكنش معانا اى ملابس دخلنا نمنا بهدومنا قالنا نامو الليله دى والصبح هنجيبلكم المهمات (المخله)
وطبعا دخلنا نمنا مرعوبين من الخوف ال سيطر علينا من الراجل ده وبعدين صحينا طبعا الساعه 4 الفجر لتجهيز انفسنا
وصلينا الفجر جماعه وبعدها عمل طابور التمام فى الساعه 5.5 صباحا ومن الطابور الى القيام ببعض اعمال النظافه
وبعدها الى ميس الافراد(يعنى مكان تناول الطعام) للافطار وطبعا اكل الميرى ده حاجة من الاخر
يعنى فووووووووووول فى الفطار والعشاء ومعه اما قطعه جبنه او قطعه حلاوه طحينية او مربى ورغيف خبز والحمد لله
طبعا الاكل ده كانه لم يكن موجود لان الاكل بالنسبه لى كان مشتريات من الكانتين
وبعد الافطار راحة شوية ثم التجمع فى تمام الساعه 7 صباحا للتجهيز لطابور العلم بالنسبه لنا كمستجدين تم ابعادنا من طابور العل لاننا لسه مستلمناش المهمات
وذهبنا لاستلامها وفى الطريق شاهدنا مشاهد غريبه
لقينا عساكر اكتافها مجروحة كتير جدا سالنا من اية قالو انتو لسه مستجدين ولااية؟ قلنا لهم اه ..قالو من الزحف ....
الزحف ده ان الشخص يستلقى على بطنه على الاسفلت ويشبك ايده مع بعضها من فوق ظهره
ويزحف اعتمادا على اكتافه الى ان تنجرح اكتافه - انا مش عايز حد يجرب _المهم اخدنا مهماتنا وبقينا زى الناس ال معانا
نروح طابور العلم من الساعه 7 صباحا تجهيز وتمام الى الساعه 7.5 ومنها نقف طابور لحد الساعه 8.5 وده طابور العلم يعنى تحية العلم
تخيلو فناء واسع جدا-الذى يتم تنفيذ حفلا تخرج الكليات العسكرية فية- متواجد فيه 2000 شخص وفى صوت واحد يقولون (تحيــــــــا جمهورية مصــــــــــر العــربيــــة).
وبعد الطابور نقوم بعمل تمارين الرياضه وهى الجري لمده مايقرب من سته كيلو متر لعده مرات
وطبعا بنردد صيحات وهتافات منها(مركز تدريب البحرى ...وحوش وحوش وحوش وايضا : فى البر بنسير فى الجو بنطير فى البحر بنغوص بحرية بحرية بحرية )
والكثير من الهتافات ولعل ماشهدناه فى بداية فيلم الطريق الى ايلات من تدريبات كانت تتم فى هذا المركز وبنفس الكيفيه .
وبعدها نأخد راحة من 10 الى 11 لتناول المشروبات والراحه ثم فى الحادية عشره نقوم باعمال التدريب
وهى اعمل شاقه جدا وتدريبا كانت مريره بحق تدخل الشخص فى نطاق كراهية كل شئ الا اننا كمجموعه كوننا صداقات متميزه
وكانت ايام رغم صعوبتها الا اننا لم نكن نتوقف عن الضحك من القلب مما يدور حولنا هستريا والله فعلا هستريا مش مصدقين ال بيحصل والاقى حوليا ناس بتبكى وناس نفسيتها تعبانه
وكنت حاسس انى عادى وطبعا المركز ده فتره 45 يوم دون خروج منه ابدا وطبعا كان هناك زيارة يومى الخميس والجمعه
ومع اول يوم زياره خرجت للاتصال بالبيت لاعرفهم مكانى واخبارى وبمجرد ان طلبت الرقم
ولما استطيع ان اقول الو او اى شئ وانخرطت فى البكاء بمجرد ان قالت والدتى: الو سلام عليكم .
وبعدها كلمتها طمنتها عليا وقلت لهم مكانى وقلت لهم على ميعاد الزياره وكلمت اصحابى
واذكر ان اتى لزيارتى والدى وهنا لا انسى ابدا وقفه صديقى عادل محرم الذى ادين له بالفضل انه كان يأتى من كفر الشيخ
لزيارتى كل يوم جمعه وتلبيه طلباتى وحاجاتى الشخصية واهمها الجرايدوايضا اصدقائى ثروت جلال وحسام الخياط الذين اتوا لزيارتى هناك.
ومرت الايام واخدنا على الاجواء وفهمناالاوضاع وعلشان كده لازم اى حد يعرف ان البداية فى اى مكان جديد دائما هى الاصعب
وكنا نقوم بعمل حلقات نقاش فى اوقات الراحة وخاصة المؤهلات العليا والله كنا بنتعامل معامله محترمه جدا جدا لاننا كنا بننأى بنفسنا عن الامور التى قد تؤذينا
وكوننا صداقات استمرت الى الان وكنت اجلس انا وصديق لى من اسكنردية وكان اعز اصدقائى فى هذه الايام وكان شخص ملتزم قبل ان يدخل الجيش وكنت احيانا
اجلس امام البحر واغنى(لماذا اسلم للبحر امرى وامنح للريح ايام عمرى وهل فى البحار سوى العاصفات .........)وايضا انا وليلى وعلمنى حبك ولوتعرفوا والعديد من الاغانى التى كنت احبها
وكان صديقى هذا يقول لى رغم انى لا اسمع الاغانى الا اننى احفظ العديد من القصائد التى غناها كاظم وغيره وكنا نجلس نتحاكى ونتسامر
والله اللي هون عليا الاايام دى هى الصحبة الطيبة وطبعا مداومتنا على الصلوات فى جماعه فوقت الصلاه يتوقف كل شئ فى المركز وكان معنا العديد من ذوى الصوت الحسن

وللحديث بقيه
مادام فى العمر بقيه
انتظروا (فى انتظارالعرض العسكري )

كفراوي اصيل تاريخ التسجيل : 19/10/2010

فعلا يامحمد احلي حاجه الاصحاب
بجد بيهونوا اي حاجه وبيخلوا الوقت يعدي بسرعه اوووي
ربنا يخليلك اصحابك يارب ويخليلنا اصحابنا
كمل يامحمد منتظره الجزء التالت

كفراوي اصيل تاريخ التسجيل : 26/10/2010 العمر : 31

ياااااه الله بجد صعب اوى بس اكيد وجودك مع اصحابك وقربك لربنا بيهون كتير
اكيد بأنتظار الجزء الثالث

KoKY كتب:: فعلا يامحمد احلي حاجه الاصحاب
بجد بيهونوا اي حاجه وبيخلوا الوقت يعدي بسرعه اوووي
ربنا يخليلك اصحابك يارب ويخليلنا اصحابنا
كمل يامحمد منتظره الجزء التالت

والله الايام دى ماهونها الا الصحبة الطيبة
ولولاها كانت هتكون جحيم
بس الحمد لله ان لنا اصحاب بيكونوا سبب فى تفريج الهموم
شكرا ليكى على مرورك وتشجيعك
وان شاء الله ال جى احسن

MaI كتب:: ياااااه الله بجد صعب اوى بس اكيد وجودك مع اصحابك وقربك لربنا بيهون كتير
اكيد بأنتظار الجزء الثالث

شكرا لمرورك المميز
وطبعا قربنا لربنا كان عامل مهم جدا فى الايام دى
ربنا يديمنا على طاعته

معلش ياجماعه هتأخر عليكم بالجزء الثالث
بس ان شاء الله
هيكون اجمل جزء لانه فيه ...........

» محمد الشريف يكتب : يوميات من حياتى العسكرية(الجزء الرابع)
» محمد الشريف يكتب : يوميات من حياتى العسكرية(الجزء الثالث)
» محمد الشريف يكتب : يوميات من حياتى العسكرية (الجزء الخامس) فى لواء المدمرات
» محمد الشريف يكتب : يوميات من حياتى العسكرية
» غدا ان شاء الله الجزء الرابع من (يوميات من حياتى العسكرية)